Proiektu honetan logela nagusia, logela nagusiko bainugela eta egongela egin ziren.
Logela nagusitik hasiko gara. Logela honek dimentsio egokiak ditu eta angeluzuzen formak—ez da oso ohikoa— banaketa hau egitea ahalbidetu digu. Honela antolatu genuen gela: oheburua paretan bermatu gabe ipini genuen, eta horri esker, jantzigela aparte geratzen da. Burualdeak altuera ertaina duenez, anplitude-sentsazioa sortzen dugu gelan, betiere jantzigela itxi gabe, eta, aldi berean, gelan argitasun gehiago egotea lortzen dugu. Elementu gehienetan kolore neutroak erabili ditugu, hala nola zuria eta grisa, baina apain-mahaiaren inguruan kolore apur bat jartzea erabaki dugu. Eremu hau bisualki erakargarria geratu da aukeratutako paper margotuari esker (apain-mahaiaren aldea L forman markatzen du), eta puf arrosa ere nabarmentzeko modukoa da. Eremu mota horiek logela berezia izatea lortzen dute eta ukitu bat ematen diote. Ikus daitekeenez, logela fina eta modernoa lortu da, eta bertan atseden hartzea benetako plazer bihurtu da.
Logela nagusiko komunarekin jarraituko dugu. Bere tamaina eta dimentsioari esker, L formako altzari bat jarri ahal izan dugu, eta lortu dugu biltegi handi bat egitea eta toki erosoa izatea eguneko lanak egiteko. Bere gainalde zabalak beldurrik gabe mugitzeko aukera ematen du. Aukeratutako koloreak hauek dira: grisa altzarietarako, zura gainalderako konketen aldean eta zuria finkatutako bi konketetarako. Ikus dezakezunez, aukeratutako koloreak logelarako hautatutako kolore berberak dira, batasuna eta homogeneotasuna lortzeko.
Azkenik, egongelari buruzko aipamen labur bat egingo dugu. Gela honek elementu nagusi eta nabarmentzeko moduko bat du: tximinia. Aukeratutako tximiniak hiru alde ditu, egongelako puntu guztietatik sua ikusteko aukera ematen diguna. Sua apaingarri bat da, berotasuna eman eta giro atsegina sortzen duena, eta neguko egunetan etxetik mugitu nahi ez izatea lortzen du. Gela horretan, bi eremu daude, jantokikoa eta sofakoa. Jantokiko eremurako, paretaren kontra banku bat jartzea erabaki da, banakako aulkien ordez. Elementu hori oso interesgarria da, joko handia ematen baitu; izan ere, gauzak gordetzeko erabili daiteke, eta gainera, aulki baten funtzioa betetzen du, alde batetik bestera mugitzeko oztopo izan gabe. Ikus daitekeen bezala, sofaren eremua guztiz hornituta dago, eta hautatutako elementuen arteko harmonia perfektua osatzen du.
